Vindeiras Convocatorias

Premios José Cantero. I Edición Galega. até o 11 de maio de 2007 Xa está en marcha a primeira edición dos Premios José Cantero en Galicia. Os premios José Cantero, convocados pola Fundación Epson | Instituto de Tecnoética, están destinados a premiar aos mellores traballos de Bacharelato, 2º ciclo da ESO e ciclos formativos no ámbito das tecnoloxías e os seus impactos sociais. Estes galardóns gozan dunha longa traxectoria en Catalunya, onde alcanzan xa a súa VII edición, e por primeira vez este ano fanse extensivos a Galicia, coa colaboración da Asociación do Profesorado de Tecnoloxía de Galicia, APETEGA. Os traballos deberán ser inéditos e non premiados noutros concursos. Poden ser de carácter práctico, experimental ou de investigación, pódense inscribir en calquera ámbito da tecnoloxía ou ben consistir nunha reflexión sobre o seu impacto social. Concederanse 5 premios que serán, cada un deles, un lote de material informático valorado en 1.230 Euros, distribuídos da seguinte maneira: 550 Euros para o autor/a ou autores/as; 250 Euros para o titor/a ou titores/as e 430 Euros para o centro. O prazo de entrega da documentación é até o 11 de maio de 2007. A notificación do xurado será o 15 de xuño de 2007 Podes atopar as bases dos premios na nosa web, ou na web da Fundación Epson | Instituto de Tecnoética. ¡Animádevos a participar! ligazón permanente Enviado o 23-01-2007

V Premios Galicia Innovación Júnior -imaxina-inventa-innova-   Xa está en marcha a edición 2007 do Concurso Galicia Innovación Júnior, organizado pola Consellería de Industria e Innovación da Xunta de Galicia. Poderán participar todos os rapaces e rapazas galegos ou residentes en Galicia de idades comprendidas entre os 12 e os 18 anos de idade, en dúas categorías: de 12 a 15 anos e de 16 a 18 ambos incluídos. Os premios serán, segundo a categoría, ordenador portátil, cámara de fotos dixital, reprodutor de música dixital con disco duro ou memoria flash, ou ben, diferente material informático se o traballo se presenta en grupo. O concurso consta de dúas fases, unha primeira onde se presenta a idea, e unha segunda onde se desenvolve a idea se esta foi seleccionada. O prazo de presentación remata para esta primeira fase o 6 de marzo de 2007 e para a segunda o 20 de maio de 2007 Máis información na web Concurso Galicia Innovación 2007. ligazón permanente Enviado o 10-01-2007

Aviso sobre o concurso para a creación do cartaz oficial das VII Xornadas de Tecnoloxía Amplíase o prazo de presentación ata o día 26 de xaneiro Logo da petición feita por varios compañeiros, amplíase o prazo para a presentación de orixinais ao concurso de cartaces a partir do cal se escollerá o oficial que anuncie as próximas VII Xornadas de Tecnoloxía de Galicia. O novo prazo é ata as 14:00 horas do día 26 de xaneiro. As bases pódense consultar aquí. ligazón permanente Enviado o 09-01-2007

Ludus Party Lugo 1, 2, e 3 de decembro de 2006 O Concello de Lugo, a través da Concellería de Servizos Xerais, organiza para os vindeiros días 1, 2, e 3 de decembro de 2006, unha actividade extraordinaria orientada á promoción das Novas Tecnoloxías e da Sociedade da Información. O programa inclúe unha exibición de robótica: Varias unidades autónomas servirán para que todo aquel que o desexe poida comprobar como unha chea de cables e mecanismos poden cobrar vida e comportarse según parámetros que imitan a vida. Despois do mostrado na exhibición de robótica, todo aquel que participe no obradoiro de robótica poderá aprender a crear un pequeno robot capaz de seguir liñas debuxadas no papel, ou realizar sinxelas accións como coller obxectos. Máis Información en:  http://www.netzonetour.com/partys/prensa.php?id=11 ligazón permanente Enviado o 29-11-2006

Asemblea e Concentración Defendamos a área de Tecnoloxía Dada a gravidade da situación actual da ensinanza da Tecnoloxía tra-la difusión do Borrador do Real Decreto de Ensinanzas Mínimas, convocamos a tódolos socios e socias de APETEGA e a todo o profesorado de Tecnoloxía de Galicia en xeral a participar nas seguintes accións: Asemblea extraordinaria de apetega. Terá lugar o vindeiro venres 24 de novembro ás 20:00 horas na biblioteca do IES Arcebispo Xelmírez I de Santiago de Compostela. Como único punto da orde do día informarase e debatirase sobre a grave situación na que se atopa a nosa área e medidas que como colectivo debemos tomar. Concentración de protesta. Como xeito de facernos escoitar, farase unha concentración de protesta diante do Edificio Administrativo da Xunta de Galicia en San Caetano (Santiago de Compostela) ás 12:00 horas do martes 28 de novembro. Dado que este acto será o de maior relevancia pública, resulta imprescindible que nos xuntemos o maior número posible de persoas, polo que se pide a máxima difusión da convocatoria desta concentración entre os compañeiros e compañeiras. Envía esta información a tódolos compañeiros de Tecnoloxía que coñezas, difunde a grave situación na que se pode quedar a nosa área... Defendamos a nosa área e o noso traballo. ligazón permanente Enviado o 17-11-2006

Concurso para a creación do cartaz oficial das VII Xornadas de Tecnoloxía de Galicia Dirixido ao alumnado de Tecnoloxía APETEGA convoca un concurso para o deseño do cartaz anunciador das VII Xornadas de Tecnoloxía de Galicia. Podes descargar aquí as bases do concurso ligazón permanente Enviado o 06-11-2006

[1] [2] [3] [4] [5] [6] [7] [8] [9] [10] [Páxina11] [12] [13] [14]