Novas

Manifesto de APETEGA ante o Borrador do Decreto de Plurilingüismo APETEGA informa: Ante a publicación do borrador do Decreto do Plurilingüismo, a Asociación do Profesorado de Tecnoloxía de Galicia (APETEGA) quere expresar a súa desconformidade co mesmo, atendendo ás seguintes razóns : Como asociación xa manifestamos a nosa preocupación ante a derogación do Decreto 124/2007, xa que consideramos que a lingua galega forma parte da riqueza e da idiosincrasia do noso país. Como todos sabemos, o seu uso está en alarmante retroceso entre a xente nova. Pensamos que dende as institucións educativas a lingua galega debe ser transmitida e apoiada para fomentar o seu uso, debe ter unha discriminación positiva, buscando que as novas xeracións vivan unha situación de igualdade real entre as dúas linguas de Galicia. A área de Tecnoloxía é relativamente nova, e xa dende o principio moitos profesores e profesoras tivemos que preparar materiais curriculares necesarios para desenvolver o noso traballo, dada a falta de recursos existentes para a área, na nosa lingua. Moitos compañeiros e compañeiras, adicaron moito tempo a producir e traducir textos ao noso idioma, preparando unidades didácticas, cursos, obradoiros, adaptando programas informáticos, facendo blogues, páxinas web, etc..., motivados pola nosa responsabilidade como docentes. Todo iso co obxectivo claro de adaptar a área de Tecnoloxía á nosa identidade cultural e lingüística. Entendemos que non hai ningún criterio pedagóxico que xustifique que a área de tecnoloxía se imparta nun idioma ou noutro. Non se debe segregar as materias por idiomas, o que levaría a privar ao alumnado de comprender e desenvolver a ciencia e a tecnoloxía en lingua galega. Por todo isto, APETEGA solicita á Consellería de Educación que tamén permita ao profesorado de Tecnoloxía de Galicia utilizar o galego como lingua vehicular do seu ensino. En Santiago de Compostela, a 25 de marzo de 2010 ligazón permanente Enviado o 31-03-2010

robotop2010 Campionato Nacional de Robots de Portugal Os días 16, 17 e 18 de abril de 2010 celebrarase o Campionato Nacional de Robots de Portugal - robotop2010, no Pavilhão Desportivo Municipal de Santo Tirso. Nesta edición haberá unha nova modalidade de competición. O prazo de inscrición remata o día 21 de marzo. Para máis información, consultar a web http://robotop2010.tomazpelayo.com ou escribir a robotop2010@gmail.com ligazón permanente Enviado o 19-03-2010

III Xornada Monográfica de APETEGA. Enerxía Solar Publicada a lista de admitidos Xa está publicada a lista de admitidos para a III Xornada Monográfica "Enerxía Solar". Podedes consultar a lista na páxina das Xornadas Monográficas, na sección "Listado de admitidos". ligazón permanente Enviado o 26-11-2009

III Xornada Monográfica de APETEGA. Enerxía Solar 28 de novembro de 2009, IES Escolas Proval de Nigrán O sábado 28 de novembro de 2009 celebraremos a III Xornada Monográfica de APETEGA no IES Escolas Proval de Nigrán. O tema da Xornada é "Enerxía Solar". O prazo de inscrición estará aberto dende o luns 9 de novembro ás 22:00 h ata o venres 20 de novembro ás 20:00 h. Tendes máis información na páxina das Xornadas Monográficas. ligazón permanente Enviado o 08-11-2009

MANIFESTO EN DEFENSA DA LINGUA GALEGA A Asociación do Profesorado de Tecnoloxía de Galicia (APETEGA) quere facer público o seguinte comunicado: Como asociación de profesorado, queremos manifestar a nosa preocupación ante a intención do novo goberno de Galicia de derrogar o Decreto 124/2007 polo que se regula o uso e promoción do galego no sistema educativo. Consideramos que a lingua galega forma parte da riqueza e da idiosincrasia do noso país, e como todos sabemos o seu uso está en alarmante retroceso. Dende as institucións educativas debe ser transmitida e apoiada para fomentar o seu uso, buscando unha situación de igualdade real entre as dúas linguas de Galicia. Asociación do Profesorado de Tecnoloxía de Galicia (APETEGA) Santiago de Compostela, 12 de xuño de 2009 ligazón permanente Enviado o 17-06-2009

[1] [Páxina2] [3] [4] [5] [6] [7] [8] [9] [10] [11] [12] [13] [14] [15] [16] [17] [18] [19] [20]